ភ្នំពេញ៖ ក្រសួងមហាផ្ទៃ និងអង្គភាព CPU កន្លងមកបានសហការគ្នាបង្រ្កាបបទល្មើសពាក់ព័ន្ធនឹងកុមារដោយសម្រេចបាននូវលទ្ធផលល្អប្រសើរ។ ជាកិច្ចបន្តទៀតនេះស្ថាប័នទាំងពីរនឹងបន្តរួមគ្នាបង្រ្កាប និងប្រឆាំងបទល្មើសនានាដែលកើតឡើងលើកុមារនៅកម្ពុជា។

រដ្ឋលេខាធិការក្រសួងមហាផ្ទៃ លោកស្រី ជូ ប៊ុនអេង និងនាយកទទួលបន្ទុកប្រតិបត្តិការ របស់អង្គភាពការពារកុមារ (CPU) នៃអង្គការមូលនិធិកុមារកម្ពុជា លោក James McCabe នាថ្ងៃទី០៣ ខែមីនា ឆ្នាំ២០២៣ បានចុះហត្ថលេខាលើអនុស្សរណៈនៃការយោគយល់គ្នា (MOU) ស្ដីពីការចូលរួមចំណែកនៅក្នុងសកម្មភាពមនុស្សធម៌ និងយុត្តិធម៌ព្រហ្មទណ្ឌ សម្រាប់អនីតិជននៅកម្ពុជា ឆ្នាំ២០២២-២០២៤។

នេះគឺជាលើកទី៤ហើយ ដែលភាគីទាំងពីរបានដាក់ចេញនូវគោលដៅរួមគ្នាដើម្បីបង្រ្កាបបទល្មើសព្រហ្មទណ្ឌដែលពាក់ព័ន្ធទៅនឹងកុមារ។

លោកស្រី ជូ ប៊ុនអេង សង្កេតឃើញថារយៈពេលជាច្រើនឆ្នាំកន្លងមកនេះ អង្គភាព CPU ដែលបង្រ្កាបបទល្មើសនានាបានស្គាល់បទពិសោធន៍កាន់តែច្បាស់ ក្នុងទម្រង់បទល្មើសដែលមានទៅលើកុមារនៅកម្ពុជា។

នាយកទទួលបន្ទុកប្រតិបត្តិការ របស់អង្គភាពការពារកុមារ (CPU) លោក James McCabe បានថ្លែងអំណរគុណដល់រាជរដ្ឋាភិបាលកម្ពុជា ក្រសួងមហាផ្ទៃ និងអគ្គស្នងការដ្ឋានគរបាលជាតិ ដែលតែងតែជំរុញកិច្ចសហប្រតិបត្តិការក្នុងការប្រយុទ្ធប្រឆាំងបទល្មើសនានាពាក់ព័ន្ធទៅនឹងកុមារអស់រយៈពេល ១០ឆ្នាំកន្លងមក៕